लामिछानेलाई भैरहवा ल्याएर हिरासतमा राखियो
सार्वजनिक विदापछि अदालतमा पेश गरिने
राष्ट्रिय स्वतन्त्र पार्टीका सभापति रवि लामिछानेलाई शुक्रबार राति काठमाडौंबाट पक्राउ गरी शनिबार बिहान यति एयरलाइन्समार्फत भैरहवा ल्याइएको छ।
गोरखा मिडिया नेटवर्कका पूर्वप्रबन्ध निर्देशकसमेत रहेका लामिछानेलाई उच्च अदालत तुलसीपुर, बुटवल इजलासले जिल्ला अदालत रुपन्देहीको धरौटीमा रिहा गर्ने आदेश उल्टाउँदै थुनामा राख्न आदेश दिएपछि प्रहरीले उनलाई पक्राउ गरेको हो।
सहकारी ठगी र संगठित अपराध मुद्दामा जिल्ला अदालत रुपन्देहीले लामिछानेलाई एक करोड रुपैयाँ धरौटीमा रिहा गर्ने आदेश दिएको थियो। सो आदेशविरुद्ध जिल्ला सरकारी वकिल कार्यालय रुपन्देहीले पुनरावेदन गर्दै उनलाई पूर्पक्षका लागि थुनामा राख्न उच्च अदालतमा निवेदन दिएको थियो।
उक्त निवेदनमा शुक्रबार सुनुवाइ गर्दै न्यायाधीश रमेश ढकाल र स्वीकृति पराजुलीको संयुक्त इजलासले जिल्ला अदालतको निर्णय बदर गर्दै लामिछानेलाई थुनामा पठाउन आदेश दिएको हो।
जिल्ला प्रहरी कार्यालय रुपन्देहीका प्रमुख एसपी रञ्जितसिंह राठौरका अनुसार शनिबार र आइतबार सार्वजनिक विदा परेकाले उनलाई अहिले जिल्ला प्रहरी कार्यालयको हिरासतमा राखिएको छ। सार्वजनिक विदा सकिएपछि उनलाई अदालतमा पेश गरी कारागार चलान गरिने बताइएको छ।
लामिछानेलाई भैरहवा विमानस्थलबाट सिधै जिल्ला प्रहरी कार्यालय लगिएको प्रहरीले जनाएको छ।
क्याटेगोरी : समाचार
थप समाचार
धेरै पढिएका
प्रतिक्रिया दिनुहोस